Пресс pелиз

Пресс pелиз

2022 йил 28 февраль куни Ўзбекистон Республикаси Транспорт вазирлиги ҳузуридаги Автомобиль йўллари қўмитаси “Умумий фойдаланишдаги автомобиль йўлларини қуриш ва реконструкция қилиш Дирекцияси” ДУКда “Коррупцияга қарши курашиш ва олдини олиш соҳасида давлат сиёсатини шакллантириш ва амалга ошириш чоралари”га  бағишланган ўқув семинари бўлиб ўтди. Ушбу тадбирда Автомобиль йўллари қўмитаси, “Ўзйўллойиҳа лойиҳа-қидирув институти” ДУК, “Йўллойиҳа бюроси” МЧЖ ва пудратчи ташкилотлари вакиллари қатнашдилар.

Ушбу ўқув семинарида Ўзбекистон Республикаси Фанлар академияси Давлат ва ҳуқуқ институти бўлим бошлиғи, юридик фанлар доктори, профессор Баратов Миродилжон Хомуджонович “Коррупциянинг жамият ва давлат учун ижтимоий хавфли хусусиятлари ва оқибатлари” ҳамда Коррупцияга қарши курашиш агентлиги масъул ходими Абдуғаниев Ойбек Алишерович “Коррупцияга қарши курашиш, коррупциянинг олдини олиш ва унга қарши курашиш соҳасидаги давлат сиёсатини шакллантириш” мавзусидаги маърузалари билан иштирок этишди.

Тадбирни “Умумий фойдаланишдаги автомобиль йўлларини қуриш ва реконструкция қилиш Дирекцияси” ДУК директори Д.М.Юсупов кириш сўзи билан очиб, тадбирдан кўзланган мақсад ҳамда Дирекцияда коррупцияга қарши курашиш бўйича амалга оширилган ишлар, қабул қилинган локал ҳужжатлар тўғрисида гапириб ўтди.

Ўқув семинари давомида сўзга чиққан профессор М.Х.Баратов коррупциянинг жамият ва давлат учун ижтимоий хавфли хусусиятлари ва оқибатлари бўйича мазмунли ва маълумотларга бой слайдлар орқали содда тилда тушунтириб ўтди. Сўнгги йилларда коррупцияга оид жиноятларни кескин ошиб кетиши тўғрисидаги статистик маълумотлари иштирокчиларнинг эътиборини жалб қилди.

Кейинги сўз навбати Коррупцияга қарши курашиш агентлиги масъул ходими О.А.Абдуғаниев берилди. У Агентлик томонидан сўнгги йилларда амалга оширилган ишлар тўғрисида маълумотлар бериб, коррупциянинг жамият ва давлат учун ижтимоий хавфли хусусиятлари ва оқибатлари тўғрисида умумий тушунчалар ҳақида гапириб ўтди. Дирекцияда коррупцияга қарши курашиш соҳасида амалга оширилган ишлар ва локал ҳужжатларни қабул қилинганлигига ижобий баҳо бериб, бу каби ишларни тизимли давом эттириш коррупцияга қарши курашишда асосий омиллардан бири бўлиб хизмат қилишини таъкидлади.

Хулоса ўрнида, тадбирда иштирок этган ходимлар ва бошқа ташкилотлар вакиллари коррупцияга оид умумий тушунчаларга эга бўлиб, бу каби иллатлар жамиятга ва шахслар тақдирига салбий таъсиридан огоҳлантирилди. Бундай тадбирларни ҳар чоракликда ўтказиб боришга келишиб олинди.