РАСМИЙ МУНОСАБАТ

РАСМИЙ МУНОСАБАТ

Media24 uz телеграм канали орқали Телеграм ижтимоий тармоқларига 2022 йил 18 декабрда тарқалган “2 км. йўлни таъмирлаш учун 41,2 млрд.?” сарлавҳаси остидаги мақола юзасидан

Media24 uz телеграм канали орқали Телеграм ижтимоий тармоқларига 2022 йил 18 декабрда тарқалган “2 км. йўлни таъмирлаш учун 41,2 млрд.?” сарлавҳаси остидаги мақола эълон қилинган эди.

Ўзбекистон Республикаси Президентининг 2020 йил 28 декабрдаги “2021-2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги ПҚ-4936-сонли қарорига асосан М39б “Тошкент ҳалқа йўли” автомобиль йўлининг 47-56 км қисмларини реконструкция қилиш белгиланган.

М39б “Тошкент ҳалқа йўли” автомобиль йўлининг 54-56 км қисмларини (2 км) реконструкция қилиш объектининг лойиҳа-смета ҳужжатлари
“Гео-проект” МЧЖ томонидан ишлаб чиқилиб, Ўзбекистон Республикаси Иқтисодий тараққиёт ва камбағалликни қисқартириш вазирлиги ҳузуридаги “Лойиҳалар ва импорт контрактларини комплекс экспертиза қилиш маркази” давлат унитар корхонаси томонидан барча солиқлар, йиғимлар ва ажратмаларни ўз ичига олган ҳолда 45 824 119 049 сўмга 2021 йил 21 майда 14/01-6-1/4295-сонли экспертиза хулосаси берилган.

Media24 uz телеграм каналида келтирилган қўшимча шартноманинг асосий шартномаси тўғридан-тўғри эмас балки, Ўзбекистон Республикаси Вазирлар Маҳкамасининг 2020 йил 19 февралдаги “Ўзбекистон Республикасида ижтимоий ва ишлаб чиқариш инфратузилма объектларини қуриш, реконструкция қилиш ва капитал таъмирлаш бўйича танлов (тендер) ўтказишни жадаллаштириш чора-тадбирлари тўғрисида”ги 91-сонли қарорида белгиланган тартибда пудратчи тендер ўтказиш орқали аниқланган.

Хусусан, ушбу объект бўйича тендер савдосини ўтказиш тўғрисидаги эълон, tender.mc.uz махсус ахборот порталининг 2021 йил 10 июндаги 13004-сонли лот билан чоп этилган. Шунингдек ушбу эълонда пудратчилар томонидан тақдим қилинадиган таклифларни қабул қилиш муддати 2021 йил 2 июль соат 23:59 га қадар белгиланган бўлиб, таклифларни қабул қилишнинг охирги муддатига қадар, қуйидаги корхоналар томонидан таклифлар келиб тушган:

1. "Автомагистрал" ихтисослашган автомобиль йўллари қуриш-таъмирлаш бирлашмаси унитар корхонаси;
2. “Автойўл саноат инвест” МЧЖ.

Тендер комиссиянинг 2021 йил 12 июлдаги 2970-сонли баёнга асосан оферентлар қуйидаги балларни тўплаган:

“Автомагистрал” ИАЙҚТБ УК 41 241 768 809 сўм, 500 кун қурилиш муддати билан, умумий 49,3454 балл;

“Автойўл саноат инвест” МЧЖ 45 456 979 960 сўм, 515 кун қурилиш муддати билан, умумий 16,8543 балл тўплашган.

Якуний баҳолаш натижаларига асосан энг кўп балл тўплаган “Автомагистрал” ИАЙҚТБ УК тендер савдосида ҚҚС билан 41 241 768 809,0 сўм ва қурилиш муддати 500 кун билан ғолиб деб топилган. Тендер савдоларида ғолиб бўлган “Автомагистрал” ИАЙҚТБ УК билан буюртмачи ўртасида объектни реконструкция қилиш бўйича 2021 йил 19 июлдаги 1/135-21-сонли пудрат шартномаси тузилган.

М39б “Тошкент ҳалқа йўли” автомобиль йўлининг 54-56 км қисмларини (2 км) реконструкция қилиш учун оферент томонидан қуйидаги таклифлар берилган:

Таклиф этилган нарх ичида қуйидаги иш турларини бажариш инобатга олинган:

1 б тоифали 6 тасмага эга йўлнинг ер ишларини бажариш, йўл асоси ва қопламасини қуриш, сунъий иншоотларини қуриш, дюкер ўрнатиш, кожухлар ўрнатиш, автобус тўхташ майдончасини қуриш, йўл ўртасига ажратувчи тўсиқ ўрнатиш, сув қочириш новларини ўрнатиш, пиёдалар йўлакчасини қуриш, 37 та туташмалар ва кесишмаларни қуриш, метал қувурлар ўрнатиш, йўл белгиларни ўрнатиш, ётиқ йўл чизиқларини чизиш ва бошқа иш турлари учун – 38 845 980 548 сўм;

• 10 дона автобекат ўрнатиш учун – 155 495 036 сўм;
• тунги ёритиш чироқларини ўрнатиш учун – 998 532 078 сўм;
• электр таъминоти ва светофорларни қуриш ва бошқариш ишлари учун - 1 241 761 147 сўм.

Мазкур пудрат шартномасининг предмети ёки бирор шарти ўзгарганда тарафларнинг келишувига асосан расмийлаштирилиб, қўшимча келишув шаклида тасдиқланади. Пудрат шартномаларининг барча қўшимча келишувлари тўғридан-тўғри тарафлар томонидан имзоланиб, ўрнатилган тартибда жамоатчилик учун очиқ маълумот сифатида https://xarid.uzex.uz сайтига Ўзбекистон Республикаси Молия вазириги томонидан жойлаштирилади.         

Media24 uz телеграм канали буюртмачи ва пудратчи ўртасида тузилган қўшимча келишувни нотўғри талқин қилиб, ижтимоий тармоқлар орқали ишончсиз ва нохолис ахборот тарқалиши натижасида кенг жамоатчиликнинг фикрини чалғитишни кўзлаб, шахс ҳақида уни обрўсизлантириш мақсадида ўз асосини топмаган ахборот тарқатган.

Шунингдек, “Ахборотлаштириш тўғрисида”ги Қонуннинг 121-моддаси 2-қисмига мувофиқ веб-сайтнинг ва (ёки) веб-сайт саҳифасининг эгаси, шу жумладан блогер ҳамма эркин фойдаланиши мумкин бўлган ахборот жойлаштириладиган Интернет жаҳон ахборот тармоғидаги ўз веб-сайтига ва (ёки) веб-сайт саҳифасига ҳамма эркин фойдаланиши мумкин бўлган ахборотни жойлаштиришдан аввал унинг тўғрилигини текшириши, шунингдек, жойлаштирилган ахборотнинг нотўғрилиги аниқланган тақдирда уни дарҳол ўчириб ташлаши шартлиги белгиланган.

“Журналистлик фаолиятини ҳимоя қилиш тўғрисида”ги Қонуннинг 6-моддасида журналистнинг мажбуриятлари белгиланган бўлиб, ўз касбига доир фаолиятни амалга ошириш чоғида журналист ўзи тайёрлаётган материалларининг тўғри ёки нотўғри эканлигини текшириши ва холис ахборот тақдим этиши шартлиги кўрсатиб ўтилган.   

Ўзбекистон Республикасининг 2007 йил 15 январдаги «Оммавий ахборот воситалари тўғрисида»ги Ўзбекистон Республикаси Қонунига ўзгартиш ва қўшимчалар киритиш ҳақида”ги  Қонуннинг 34-моддасига асосан “Юридик ёки жисмоний шахс оммавий ахборот воситасида эълон қилинган, ҳақиқатга мос келмайдиган ҳамда ўзининг шаъни ва қадр-қиммати ёки ишчанлик обрўсини таҳқирловчи маълумотлар учун раддия беришни таҳририятдан талаб қилишга ҳақлидир.”- деб белгиланган.

Шу муносабат билан, ушбу Қонунда белгиланган муддатда Media24 uz телеграм канали маъмуриятидан ўрнатилган тартибда раддия берилиши талаб этилади.